कोहलपुर, बाँके । बाँकेको कोहलपुर नगरपालिकामा मदिरा सेवनपछि भएको दाजुभाइबीचको विवादले दुःखद रूप लिँदा एक जनाको ज्यान गएको छ। आफ्नै सहोदर दाजुको हत्या गरेको आरोपमा प्रहरीले भाइलाई पक्राउ गरेको छ।
पक्राउ पर्नेमा कोहलपुर नगरपालिका–४ गोहवाका २० वर्षीय विनोद चौधरी रहेका छन्। उनीमाथि आफ्नै २६ वर्षीय दाजु मनोज चौधरीको हत्या गरेको आरोप लागेको छ।
इलाका प्रहरी कार्यालय कोहलपुरका प्रहरी निरीक्षक हरिप्रसाद पुनका अनुसार आइतबार साँझ करिब ७ बजे मदिरा सेवनपछि सामान्य विषयमा दाजुभाइबीच विवाद भएको थियो। विवाद चर्किएपछि मनोज भाइलाई कुट्न अघि बढेका थिए। त्यसक्रममा विनोदले ठूलो ढुङ्गाले मनोजको टाउकोमा प्रहार गरेका थिए।
प्रहरीका अनुसार ढुङ्गाको प्रहारपछि मनोज सिक्टा सिँचाइ नहरमा खसेका थिए। स्थानीयबाट सूचना प्राप्त हुनासाथ प्रहरी बिट मदनचोक र इलाका प्रहरी कार्यालय कोहलपुरबाट खटिएको टोलीले नहरबाट उनको शव निकालेको थियो।
घटनापछि विनोदले आफूले लगाएको कपडा परिवर्तन गरी फरार हुने प्रयास गरेका थिए। तर प्रहरीले तत्काल खोजी गरी उनलाई नियन्त्रणमा लिएको जनाएको छ।
मृतकको शव पोस्टमार्टमका लागि भेरी अस्पताल, नेपालगञ्ज पठाइएको छ। घटनाको थप अनुसन्धान भइरहेको प्रहरीले जनाएको छ।
