मगर समुदायको मौलिक भेषभूषा, परम्परागत खानपान, सांस्कृतिक झाँकी तथा नयाँ वर्ष २०८३ को अवसरमा सञ्चालन भइरहेको शुभकामना आदान–प्रदान मेला आज तेस्रो दिन विविध कार्यक्रमसहित भव्य रूपमा सम्पन्न भएको छ।
तेस्रो दिनको कार्यक्रममा विभिन्न सांस्कृतिक प्रस्तुति, लोक नृत्य तथा गीत–संगीतले मेलास्थललाई निकै जीवन्त बनाएको थियो। गोपाल नेपाल जि.एम. र जानकी तारामी मगरको विशेष प्रस्तुति दर्शकहरूको मुख्य आकर्षणका रूपमा रह्यो। उनीहरूले प्रस्तुत गरेका मौलिक सांस्कृतिक कार्यक्रमले उपस्थित दर्शकहरूलाई मनोरञ्जनसँगै आफ्नो संस्कृतिप्रति गर्व गर्ने वातावरण सिर्जना गरेको थियो।
मेलामा मगर समुदायको पहिचान झल्काउने पारम्परिक भेषभूषा, खानपान तथा झाँकीहरूको निरन्तर प्रदर्शन भइरहेको छ। यसले स्थानीयबासी मात्र नभई बाह्य क्षेत्रबाट आएका दर्शकहरूको समेत उल्लेख्य ध्यान आकर्षित गर्न सफल भएको छ।
आयोजकका अनुसार, यस मेलामार्फत मगर भाषा, कला र संस्कृतिको संरक्षण तथा प्रवर्द्धन गर्नुका साथै नयाँ वर्ष २०८३ को अवसरमा आपसी सद्भाव र शुभकामना आदान प्रदान गर्ने उद्देश्य प्रभावकारी रूपमा पूरा हुँदै गएको छ।
यसैबीच, भोलि मेला अझ रोमाञ्चक बन्ने अपेक्षा गरिएको छ, किनकि चर्चित नेपाली अभिनेता पल शाहको आगमन हुने कार्यक्रम तय गरिएको छ। उनको उपस्थितिले दर्शकहरूको उत्साह झन् बढाउने र मेलाको रौनकलाई थप उचाइमा पुर्याउने विश्वास गरिएको छ।
